Sot hapet seanca vjetore e Parlamentit Kulturor Evropian (ECP), që sivjet mbahet në qytetin Girona të regjionit Katalan në Spanjë. Është ky edicioni i 14të i seancës vjetore të këtij institucioni kulturor panevropian dhe do të mbahet nga 30 tetor deri më 1 nëntor.
Fjalën hyrëse do t’a mbajë Ministri i Kulturës i Katalonisë Ferran Mascarell, ndërsa ndër temat e shumta që do të diskutohen në panele do të jenë: mbështetja publike për kulturën, kriza multidimensionale evropiane, kreativiteti dhe identiteti kulturor regjional dhe ai global, artistet dhe organizatat e artit në debatin mbi nacionalizmin qytetar dhe identitetin, etj.Kosovën në këtë seancë do ta përfaqësojë Fatos Berisha, anëtar i ECP dhe drejtor artistik i PriFest.
“Besoj se është shumë me rëndësi që përfaqësues nga Kosova të jenë prezent në Parlamentin Kulturor Evropian, dhe pasi unë jam i vetmi nga Kosova në këtë sesion të ECP do të përpiqem të jap kontributin tim duke informuar anëtarët e ECP për zhvillimet kulturore në Kosovë, njëherit duke falënderuar përkrahjen e deritashme të Sekretarit të përgjithshëm të ECP Karl-Erik Norman që vetëm brenda këtij viti dy herë kishte shkruar letra ne përkrahje të institucioneve të pavarura te kulturës së Kosovës, gjegjësisht me rastin e anulimit të edicionit të PriFest dhe me rastin e tentimit të largimit të Stacion – Qendra per Art Bashkëkohor nga premisat ku vepron”, është shprehur Berisha.
Po sipas tij, ai do të jap informacione rreth aplikimit të Kosovës në UNESCO, rëndësinë dhe legjitimitetin e këtij aderimi. “Pasi jam edhe shtetas i Kosovës dhe Shqipërisë, dhe nuk kemi përfaqësues të Shqipërisë në ECP do të tentoj të jap informacione edhe për Shqipërinë dhe skenën kulturore shqiptare”, ka thënë më pas Berisha. Sesioni i kaluar i Parlamentit Kulturor Evropian u mbajt në Prishtinë nën patronatin e Ministrit të atëhershëm të kulturës Memli Krasniqi./KultPlus.com