Kandidati i LDK-së për kryetar të Prizrenit, Eqrem Kryeziu dhe kryetari i BD-së, Zafir Berisha,nënshkruan zyrtarisht marrëveshjen e koalicionit. Kryeziu dhe Berisha janë shprehur të sigurt se ky koalicion me 1 dhjetor do të dalë fitues në Prizren. “Me 1 dhjetor të gjithë qytetarët do të festojnë fitoren e ndryshimit”, thanë Kryeziu dhe Berisha.
Kryeziu i LDK-së ka falënderuar Zafir Berishën për gadishmërin që ka shprehur për lidhjen e këtij koalicioni. “Sipas vlerësimeve tona ky koalicion do të jetë për të mirën e qytetarëve dhe të Prizrenit”, tha Kryeziu. Ai tha se shpreson se këtij koalicioni do t’i bashkëngjiten edhe partitë e tjera politike.
Kryetari i BD-së, Zafir Berisha tha ndërkaq se ky koalicion do të ndryshojë gjendjen e keqe në Prizren. “Komforë votës së qytetarëve kemi ardhur në përfundim që rrugëtimin tonë të fitores ta vazhdojmë me LDK-në. Ky koalicion është logjik edhe pse për disa nuk tingëllon kështu. Ne nuk jemi pajtuar që situata e rëndë të vazhdojë edhe më tej në Prizren”, tha Berisha. Ai tregoi se sot ka paraparë të takohet edhe me kandidatin e PDK-së për kryetar të Prizrenit, Ramadan Mujën, “mirëpo nuk kam mundur sepse ka qenë në gjykatë”. “Unë kafe dhe koalicione nuk mund të bëjë në gjykata”, tha Berisha.
Kryeziu dhe Berisha nuk kanë preferuar shumë të merren me akuzat dhe përplasjet që kanë pasur gjatë qeverisjes së pasluftës. “Prej vitit 2007 kam avancuar në politikë. Edhe pse kam qen kundërshtar i Kryeziut në atë kohë nuk e kam përdorur termin krim. Këtë term kam filluar të përdori kohën e fundit”, tha Berisha. Ai tha se nuk do të merret me të kaluarën. “ Ky koalicion është lidhur për të ardhmen”.
Berisha ka mohuar se në lidhjen e këtij koalicioni ka ndikuar Fatmir Limaj dhe Jakup Krasniqi. “Limajn dhe Krasniqin i kam miq të vjetër. S’kanë lidhje ata me këtë punë, sepse shpatat janë rrahur për Prizren”. /PrizrenPress.com/