Me përjashtim të Lëvizjes Vetëvendosje e cila nuk do koalicione, të gjitha subjektet tjera politike janë duke biseduar dhe negociuar mes vete në shumicën e komunave për garën e balotazhit.
Derisa në garën e raundit të parë, subjektet politike dhe kandidatët për kryetarë komunash shpërndanin akuza të ndërsjella, pas 3 nëntorit, kandidatët dhe subjektet politike po i shikojnë vetëm përparësitë dhe urat e bashkëpunimit që mund të kenë për të finalizuar garën më 1 dhjetor në zgjedhjet e balotazhit. Deri tani janë formalizuar dy koalicione interesante mes subjekteve politike që në nivelin qendror nuk kanë ndonjë bashkëpunim të mirë deri tani,shkruan Tribuna.
Në Lipjan, Lidhja Demokratike ka nënshkruar koalicion për balotazh me Aleancën për Ardhmërinë e Kosovës dhe Lidhjen Demokratike të Dardanisë që udhëhiqen nga kandidati Fitim Selimi që deri para dy muajve ishte zyrtar i lartë i PDK-së në këtë komunë.