Duke marrë pjesë në aktivitetin e PDK-së, Kadri Kryeziu, ka shkelur Kodin e mirësjelljes së Gjykatës Kushtetuese, sipas të cilit “gjyqtarët … nuk duhet të marrin pjesë në aktivitete politike”, shkruan sot Koha Ditore.
Kryetari i Kushtetueses, Enver Hasani, i ka kërkuar Kryeziut deklarim me shkrim për veprimin. Përgjigjja duhet të kthehet deri në fund të kësaj jave. E një burim i gazetës ka thënë se, më së largu më 12 qershor, gjyqtari do të dalë në procedurën e përgjegjësisë, deri në shkarkim.
Një burim i “Kohës Ditore” ka thënë të hënën se vendimi për inicimin e procedurës së shkarkimit të këtij gjyqtari të Gjykatës Kushtetuese, do të merret brenda dy javësh.
“Tani për tani një gjë e sigurt është: ai do të dalë në procedurën e përgjegjësisë, deri në shkarkim”, ka thënë ky burim. “Kjo do të ndodhë jo më larg se më datën 12 qershor, sepse duhet të mblidhen edhe faktet e rastit”.