Drejtuar nga nënkryetari i Komunës së Malishevës, Rexhep Mazreku, është mbajtur mbledhja e rregullt e Këshillit të Drejtorëve, ku është raportuar për punët dhe planifikimet e drejtorive. Në këtë mbledhje, u bë e ditur se është hapur konkursi për ndarjen e bursave për studentët e Komunës së Malishevës, për vitin 2017.
Sipas drejtorit të Drejtorisë për Arsim dhe Edukim, Avdi Morina, konkursi është i hapur deri më 11 shkurt 2017, dhe konkursi është hapur sipas Rregullores së Kuvendit të Komunës dhe me vendim të Kryetarit të Komunës. Drejtori Morina, bëri të ditur se do të ndahen pesëdhjetë bursa, për pesëdhjetë student të Komunës së Malishevës, të cilët studiojnë në Universitetet Publike në Republikën e Kosovës.
Përndryshe në mbledhjen e sotme të Këshillit të Drejtorëve, edhe drejtorët e drejtorive tjera, kanë raportuar për përgatitjet e tyre për fillim e procedurave për realizimin e projekteve për këtë vit, në të gjitha sektorët ku janë planifikuar investime, sipas listës së projekteve kapitale të miratuar në Kuvendin e Komunës.