Lideri i AAK-së Ramush Haradianaj ka treguar se nesër do të niset për vizitë zyrtare në SHBA. Ai ka thënë se fillimisht do të shkojë në Washington, për të vazhduar pastaj drejt New York-ut.
“Agjendën do t’ua dërgojmë nesër përmes një komunikate”, ka thënë Haradinaj për gazetën Express. Ai ka folur edhe për krizën e numrave në Kuvendin e Kosovës duke thënë se është përgjegjësi e partive në pushtet që ta bëjnë kuorumin në Parlament.
Megjithë këtë Haradinaj ka lënë të kuptohet se vendi mund të shkojë në zgjedhje pa përfunduar mandati i rregullt i institucioneve.
“Po shihet se do të kemi zgjedhje më shpejtë se sa që është pritur. Por së pari duhet t’i kryejmë reformat e nisura zgjedhore”, ka thënë ai.
Ish Kryeministri Haradinaj ka folur edhe për takimin që ka pasur me Shefin e Qeverisë Hashim Thaçi, para pak ditësh. Ai ka thënë se temë kryesore e këtij takimi ka qenë procesi i bisedimeve që është duke ndodhur në Bruksel.