Fshati Gjonaj i Hasit është në hall me hajnat. Në këtë fshat, ditë më parë, janë plaçkitur dy familje.
Sami Osmanollaj tregon se hajnat në shtëpinë e tij, kanë vjedhur 4 mijë euro, si dhe sende të tjera të floririt po ashtu në vlerë prej 4 mijë euro.
“ Hajnat kanë hyrë nga prapa shtëpisë në kohën kur po hanim darkën”, tregon Osmanollaj, raporton RTK.
Sipas tij, vjedhja ka ndodhur në ora 19: 30 minuta.
“E kemi lajmruar policin, por rasti ende nuk është zbardhur”.
Natë të frikshme këto ditë ka kaluar edhe Shkurte Kabashaj.
Ajo tregon se “mysafirët e paftuar” kanë hyrë në shtëpinë e saj, pas mesnate, “por për fat ata ikën pasi u ndezën dritat”.
Kuvendari i LDK-së Haziz Hodaj tha se janë shqetësuese vjedhjet e shpeshta në Has. Sipas tij, policia duhet të angazhohet më shumë në parandalimin e kësaj dukurie.
“Policia ka kërkuar bashkëpunim nga banorët. Ky bashkëpunim është duke ndodhur, mirëpo rastet e vjedhjeve nuk janë duke u ndalur. Policia është ankuar se pas kapjes hajnat po lirohen nga organet e tjera të drejtësisë”, tha Hodaj.
Zëdhënësi i Policisë në Prizren Hazir Berisha tha ndërkaq, përmes telefonit se, për këto raste nuk kanë asnjë raport./ RTK/