Kandidati për deputet nga LDK, Valdet Hoxha, ka thënë se partia e tij nuk ka emër për president, por se Vjosa Osmanin nuk do ta votonin në asnjë mënyrë.
Madje, u.d presidenten e ka quajtur edhe një mashtruese të votuesve që po i dërgon te një lëvizje e majtë, njofton Klan Kosova.
“Në parim ne s’kemi emër dhe nuk jemi as për as kundër, por konsideroj që abstenimi i Osmanit, mosvotimi i qeverive të ndryshme, mosvotimi i demarkacionit si një çështje kyçe për liberalizimin e vizave, e bëjnë atë të padenjë për presidente. Ky më shumë është mendimi im personal sesa i LDK-së. Një presidente e vendit s’duhet të jetë përçarëse, s’duhet të jetë e kapur pas interesave personale, s’duhet të thirret në vlera që s’i përfaqëson dhe t’i mashtrojë votuesit dhe t’i çojë në gjirin e një lideri tjetër që ka bërë çmos ta shkatërrojë LDK-në”.
“Osmani është një shembull i keq dhe assesi një magnet që i tërheq votuesit e LDK-së. Ajo është një shembull i keq i një lidereje që unë besoj që është e vetmja në rajon si pretendente për presidente që nuk e merr pas vetes asnjë figurë, qoftë edhe mediokre. Ja që ajo është një shembull i keq se si keqpërdoret një shtëpi e madhe dhe mundohet që t’i keqpërdorë votuesit dhe në forcën e magnetit t’i çojë në një lëvizje të majtë që është për keqardhje”.
Hoxha në Info Magazine ka thënë se kanë hyrë fuqishëm në garë për vendin e parë duke thënë se në matjet e tyre që s’i publikojnë janë mirë dhe se këtë e shohin edhe në takimin me strukturat.
“Asnjë individ s’ka lëvizur nga LDK-ja”.
Ndërkaq, për vendimin e Gjykatës Kushtetuese që lë jashtë garës kandidatët për deputet që kanë dënim në tri vjetët e fundit, ka thënë se partia e tij asnjëherë s’i komenton vendimet e gjykatave dhe këtë s’e bëri as në rastin kur Gjykata Kushtetuese rrëzoi Qeverinë Hoti.