Ipeshkvi i Kosovës, Mark Sopi, i ka dalur në mbrojtje mësueses nga Malisheva, Fatmire Bujupit, të cilës po i kërkohet që të mos japë më mësim, vetëm se ajo bart shami, njofton Klan Kosova.
Sopi, që e quajti motër Bujupin, tha se ndjehet i zëmëruar që asaj po i mohohet e drejta për të qenë mësuese.
“Unë s’jam mysliman, por dua të shpreh zemërimin tim si shqiptar që një motrës sime i mohohet e drejta të jetë mësuese vetëm se bartë shami”, pohoi Sopi.
Ai këto deklarata i bëri në Konferencën Shkencore të organizuar nga përfaqësues të Bashkësive Islame të Kosovës, Maqedonisë e Shqipërisë, për 30 vjetorin e revistës “Dituria Islame”.