Lideri i Lidhjes Demokratike të Kosovës dhe njëherësh kryeministër i vendit, Isa Mustafa i ka ftuar nesër në takim deputetët e partisë së tij, që të votojnë për presidentin e ri. Një deputet i LDK-së në kushte anonimiteti i ka thënë Gazetës Blic, se mbledhja e Grupit Parlamentar, ku i pranishëm do të jetë edhe Isa Mustafa do të mbahet nesër nga ora 9:00.
“Nesër nga ora 9:00 është thirrur takimi i Grupit Parlamentar. Në takim do të jetë i pranishëm edhe kryetari i partisë, Isa Mustafa. Qëllimisht takimi është thirrur 2 orë para mbajtjes së seancës për zgjedhjen e Hashim Thaçit president, në mënyrë që t’i siguroj votat”, ka thënë ky burim brenda LDK-së.
Sipas këtij burimi, Isa Mustafa ka paralajmëruar se do t’i kërcënoj deputetët e LDK-së, se nëse shkohet në zgjedhje të reja, për shkak të mos zgjedhjes së Hashim Thaçit president, atëherë ata ka rrezik që të mos i fus fare në lista zgjedhore.
Deri më tani vetëm deputetja Vjosa Osmani dhe deputeti Adem Salihaj, nga LDK kanë paralajmëruar se nuk do të marrin pjesë në seancën e zgjedhjes së presidentit të ri.
Ndërkohë, deputetët tjerë si: Arben Gashi, Armend Zemaj, Fatmir Rexhepi, Alma Lama, Doruntinë Maloku, Anton Quni dhe Melihate Tërmkolli ende nuk janë përcaktuar nëse do të votojnë për zgjedhjen e Hashim Thaçit për president Hashim Thaçin apo jo.
Kryesia e Kuvendit, seancën e radhës e ka caktuar për ditën e premte nga ora 11:00. / Gazeta Blic