Lideri i Lidhjes Demokratike të Kosovës, Isa Mustafa nuk do të kandidoj për kryetar të Kuvendit gjatë seancës së nesërme konstituive. Kështu kanë bërë të ditur burime të larta të Gazetës Blic brenda LDK-së. Sipas këtyre burimeve, Blloku do ta lë PDK-në që ta paraqes kandidatin e saj dhe s’do të tentoj fare ta kandidoj Mustafën.
“Blloku ka vendosur që me e lënë PDK-në me kandidaturën e saj. Nuk do ta kandidoj nesër Isa Mustafën për kryetar të Kuvendit. Madje, as nuk do të tentoj ta bëjë një gjë të tillë”, ka thënë ky burim i Gazetës Blic.
Sipas këtij burimi, Blloku pas mbylljes së seancës së nesërme të Kuvendit, ku besojnë se PDK nuk do të arrij t’i bëjë numrat, do të thërras një seancë të jashtëzakonshme.
“Në këtë seancë Blloku do ta kandidoj Isa Mustafën për kryetar të Kuvendit, duke u thirrur në pikën 127 të aktgjykimit të Gjykatës Kushtetuese. Isa Mustafa do t’i marrë 83 vota”, ka thënë ky burim.
Ndryshe, kryesuesja e seancës konstituive, Flora Brovina ka thirrur për nesër vazhdimin e seancës konstituive.