Ish-asamblisti i Komunës së Malishevës, Izet Morina, në seancën fillestare të mbajtur të premten, në Gjykatën Themelore në Gjakovë, dega në Malishevë, e ka pranuar fajësinë për veprën penale “mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.
Pas leximit të aktakuzës nga ana e prokurorit Bajram Kryeziu, i akuzuari Izert Morina, ka deklaruar se ndihet fajtor për këtë vepër penale dhe se ky ishte një veprim i paqëllimshëm nga ai.
“E pranoj se nuk e kam deklaruar në afat kohor pasurinë, por kamë qenë shumë i angazhuar me punë, dhe për këtë arsye nuk e kam deklaruar pasurinë”, ka thënë i akuzuari.
Pranimi i fajësisë nga i akuzuari, nuk është kundërshtuar nga prokurori Kryeziu, dhe është aprovuar nga gjykatësi i çështjes Njazi Morina, me arsyetimin se i akuzuari i ka kuptuar natyrën dhe pasojat e pranimit të fajit, se ky pranim gjen mbështetje në provat dhe faktet që i përmban aktakuza si dhe aktakuza nuk përmban asnjë shkelje ligjore apo faktike.
Ndryshe, në seancë ka prezantuar edhe përfaqësuesja e Agjencisë Kundër Korrupsionit, Lindita Ahmeti, e cila ka kërkuar që i akuzuari të dënohet sipas ligjit.
Shpallja e aktgjykimit në këtë çështje penale do të bëhet më 21 maj 2019, në ora 15:00.
Sipas aktakuzës së ngritur më 27 dhjetor 2017, Izet Morina, akuzohet se nga data 1 mars e deri më 31 mars 2017, në cilësinë e zyrtarit së lartë publike, respektivisht këshilltar në Asamblenë Komunale në Malishevë edhe pse ka qenë i detyruar ta bëjë deklarimin e pasurisë, të ardhurave, dhuratave, dobisë tjetër materiale apo detyrimeve financiare, nuk ka deklaruar pasurinë për periudhën e vitit 2016, edhe pse këtë është dashur ta bëjë deri më datën 31.03.2017.
Në aktakuzë thuhet se me këto veprime, i akuzuari Izet Morina, ka kryer veprën penale “Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, nga neni 437 par.1 të KPRK-së. /Betimipërdrejtësi