Ish-lojtari i Juventus-it dhe aktualisht i Genoa-s në Serie A italiane, Manolo Portanova akuzohet për dhunë seksuale në grup.
Më 7 qershor, mesfushori së bashku me dy të rinj të tjerë duhet të paraqiten përpara gjykatëses, Ilaria Cornetti-t në Gjykatën e Sienës.
Natën mes 30 dhe 31 majit 2021, në një apartament në qendër të Sienës, Portanova së bashku me dy të tjerët dhe një person të katërt, i mitur, janë përfshirë në sulm seksual ndaj një 21-vjeçare.
Për Portanova-n dhe të dyshuarit e tjerë të moshës madhore është urdhëruar arrest shtëpiak fillimisht dhe më pas është revokuar.
Pas 10 muajsh hetime, marrje në pyetje, hetime në celularët e të rinjve dhe vajzës së sulmuar, prokurori Nicola Marini urdhëroi ngritjen e aktakuzës ndaj futbollistit.
21-vjeçari që është dhe pjesë e Kombëtares së Italisë U-21 ishte autori i golit të fitores së Genoa-s në ndeshjen e fundit në Serie A përballë Torino-s më 18 mars.
/Albanianpost.com