Zëvendëskryeministrja e Kosovës, Edita Tahiri, ka thënë se janë në pritje të raportit të Ministrisë së Administratës dhe Pushtetit Lokal (MAPL) se si ka shkuar ecuria e inaugurimit të organeve komunale në katër komunat në veri, për të ditur nëse janë respektuar ligjet e Kosovës.
Ajo ka deklaruar për “Epokën e re”, së Qeveria e Kosovës do të veprojë konform raporteve të cilin do ta përpilojë MAPL-ja.
“Gjatë inaugurimit të organeve komunale në veri të Kosovës, MAPL-ja ka qenë prezente përmes grupeve monitoruese. Tani grupet monitoruese janë duke përgatitur raportin për rrjedhat e seancave inauguruese dhe më pas MAPL-ja do t’ia dorëzojë zyrtarisht Qeverisë së Kosovës këtë raport. Dhe pasi që të kemi këtë raport, Qeveria do të vendos për hapat e mëtutjeshëm dhe masat ligjore që parashihen me ligjet dhe Kushtetutën e Kosovës, konform asaj që thotë raporti”, është shprehur Tahiri.