Qindra anëtarë dhe simpatizantë të AAK-së dhe LDD-së të lagjes “ 11 Marsi “ dhe “ 2 Korriku “ janë tubuar në lokalet e shkollës fillore “ Lekë Dukagjini “ në Prizren, në mbështetje dhe përkrahje të kandidatit për kryetar të Prizrenit, Lulzim Kabashi dhe koalicionit AAK-LDD.
Hapjen e këtij tubimi zgjedhor e bëri kryetari i Nëndegës së LDD-së “ 11 Marsi “ Ramiz Llugaxhiu.
Kryetari i Degës së AAK-së në prizren, Fatmir Kastrati tha se gjatë kësaj periudhe kohore që janë mbajtur takime, tek qytetarët e Komunës së Prizrenit vërehet interesim i madh për ndryshime.
“Këto ndryshime do të ndodhin vetëm me ardhjen në qeveri të koalicionit AAK-LDD, dhe me zgjedhjen për kryetar të Komunës së Prizrenit, kandidatin e përbashkët të koalicionit Lulzim Kabashi, i cili kësaj radhe para qytetarëve ka dalë me platformë zgjedhore konkrete për zhvillimin ekonomik”.
Kurse kandidati për kryetar të Prizrenit Lulzim Kabashi duke shpalosur platformën e tij zgjedhore i premtoi elektoratit se brenda katër viteve të ardhshme gjatë qeverisjes së tij, secila familje në komunën e Prizrenit do të ketë së paku një anëtar të punësuar.
Kabashi tha se hapja e vendeve të reja të punës do të realizohet përmes zhvillimit ekonomik, bujqësisë, turizmit dhe ndërtimtarisë.
Kabashi e siguroi këtë elektorat se qeverisja e ardhshme e udhëhequr nga ai nuk do të jetë e korruptuar, ndërsa sa i përket investimeve në rregullimin e infrastrukturës së përgjithshme ai tha se firmat që do të përzgjidhen për te realizuar projektet e parapara për t’u realizuar, nuk do t’i paguajnë haraq komunës siq ka ndodhur deri më tani, por ndërtimet do të bëhen kualitative me të gjitha parametrat e caktuara.
Para anëtarëve dhe simpatizantëve të këtij koalicioni, janë prezantuar edhe katër kandidatët e këtyre lagjeve për Asamble Komunale, Emine Avdyli, Naim Qelaj, Majlinda Ukaj dhe Haxhi Seferqaj, të cilët kërkuan votën e elektoratit, duke shprehur gatishmërinë e tyre se do të jenë zë i fuqishëm në mbrojtjen e interesave dhe kërkesave të qytetarëve. Ndërsa krejt në fund të këtij tubimi, nga kryesia e degës së LDD-së në Prizren, ju nda mirënjohje Avdullah Krasniqit – ish aktivist i dalluar i degës së LDD-së në Prizren./PrizrenPress.com/