Ndonëse posti kryesor politik në vend, ai i Kryeministrit vazhdon të jetë i diskutueshëm se kujt do t’i takoj PDK-së apo LDK-së, në ndërkohë ka filluara gara në PDK se kush do ta marrë postin e kryetarit të Kuvendit.
Gazeta Blic nga burime të saja ka marrë vesh se më nuk do të jetë në garë për kryetar të Kuvendit asnjëri nga dy kandidatët që PDK i kishte kandiduar më herët. Pra, as Agim Aliu e as Arsim Bajrami më nuk do të jenë në garë për pozitën e kryekuvendarit.
“Momentalisht si emra më të mundshëm po përmenden emri i nënkryetarit Hajredin Kuçi dhe i zëvendëskryetarit, Kadri Veseli. Mirëpo, asgjë nuk është definitive, sepse mund të ndodhë që të jetë edhe ndonjë kandidat i tretë dhe Veseli e Kuçi të jenë pjesë e ekzekutivit”, ka thënë ky burim i Gazetës Blic brenda PDK-së.
Në opinion po qarkullojnë informata se Kadri Veseli mund të jetë edhe zëvendëskryeministri i parë dhe ministër i ndonjë dikasteri të rëndësishëm, nëse këtë post do ta merrë LDK-ja.
Nënkryetari i PDK-së, Hajredin Kuçi i ka thënë Gazetës Blic, se ende nuk janë duke diskutuar për poste.
Ndërkohë, deputetja më e vjetër e Kuvendit të Kosovës, Flora Brovina ka paralajmëruar se shumë shpejt do ta thërras seancën konstituive, porsa koalicioni LDK- PDK ta ketë emrin e kryetarit të Kuvendit.
Gazeta Blic para disa ditësh raportoi se me gjasë të mërkurën mund të thirret seanca konstituive e Kuvendit.
Vendi pas më shumë se pesë muajsh bllokadë, ku askush nga partitë parlamentare nuk pranonte të hynte në koalicion me PDK-në, ka arritur që të ketë një koalicion. Është partia e Isa Mustafës, LDK ajo e cila u largua nga Blloku dhe iu bashkua PDK-së.