Meteorologu Mendim Rugova, në një prononcim për Telegrafin ka theksuar se sonte në orët e vona të mbrëmjes pritet përkeqësim i motit, me të reshura të dobëta shiu dhe bore, që do të zgjasë edhe gjatë ditës së nesërme.
Sipas tij, fillimisht do ketë reshje shiu, që më pastaj gjatë ditës do të shndërrohen në borë. “Nesër në mbrëmje pritet kthjellim i motit, ku temperaturat do të zbresin nën zero gradë celsius”, ka theksuar ai.
“Nga dita e mërkurë do të mbajë mot kryesisht i kthjellët. Të mërkurën dhe të enjten temperaturat minimale do të shkojnë nga –shtatë gradë celsius deri në -10 gradë celsius, ndërsa maksimalet nga zero gradë celsius deri në katër gradë celsius”, tha ai.
Të premten dhe gjatë ditëve të fundjavës do të mbizotërojë mot i kthjellët, me ngritje graduale të temperaturave.
“Gjatë ditëve të vikendit pritet që temperaturat të arrijnë deri në shtatë gradë celsius në Prishtinë, ndërsa në Dukagjin temperaturat do të lëvizin nga nëntë gradë celsius deri 10 gradë celsius”, tha Rugova.