Kryetari i Komunës së Malishevës, Isni Kilaj, ka mbajtur sot takimin e fundit të rregullt, të këtij mandati katër vjeçar të kësaj përbërje të Këshillit të Drejtorëve. Në këtë mbledhje, kryetari Kilaj dhe drejtorët e drejtorive komunale, e cilësuan mandat të suksesshëm, pasi janë realizuar qindra projekte, është rritur cilësia e shërbimeve komunale dhe administrative, si dhe nuk është regjistruar asnjë ankesë në drejtim të Komunës së Malishevës, për neglizhencë ose moskryerje të shërbimeve, e këtu i shtohet edhe fati se asnjë zyrtar komunal nuk është hetuar për moskryerje të shërbimeve zyrtare, apo për korrupsion.
“Pavarësisht prej sfidave, kemi pasur suksese të jashtëzakonshme dhe është bërë punë e mirë me këtë qeverisje. Kjo është meritë e të gjithëve së bashku. Jemi shembull i qeverisjes së mirë”, tha mes tjerash kryetari Kilaj. “Janë realizuar qindra projekte, duke filluar nga krenaria jonë, Shkolla e mesme profesionale (Qendra e Kompetencës), e cila është shkolla më moderne në rajonin e Ballkanik, pastaj Palestra Sportive, Shtëpia e Kulturës, shkollat tjera të ndërtuara, qindra kilometra rrugë, qindra kilometra kanalizime, ujësjellës dhe të tjera, që neve na bëjnë të ndihemi krenar me punën tonë”, tha më pas Kryetari i Malishevës, Isni Kilaj.
“Janë rritur shërbimet komunale, është rritur cilësia dhe kapaciteti i shërbimeve administrative, janë rritur në shërbimet shëndetësore dhe cilësia në këto shërbime, si në QKMF ashtu edhe në shërbimet ambulatore dhe nga ekipet mobile, direkt në shtëpitë e pacientëve, jemi e vetmja komunë që i dërgojmë të sëmurët rëndë, jashtë vendit, me shpenzime të komunës, bëhet transporti i personave në hemodializë dhe shumë shërbime tjera, të cilat na bëjnë të ndihemi krenar me punën tonë”, tha Kilaj.
Ai më pas përmendi edhe një fakt që e fuqizon qeverisjen e mirë, pasi “asnjë zyrtar komunal në Malishevë, nuk është hetuar, e mos të flasim për tu marr gjykatat për korrupsion apo moskryerje të shërbimeve komunale, madje nuk kemi marrë asnjë ankesë nga qytetarët për kryerje të shërbimeve, pastaj është edhe transparenca e plotë, dhe kjo na bën të ndihemi mirë dhe krenar me qeverisjen katërvjeçare të Malishevës dhe e gjithë kjo është meritë e përbashkët, duke filluar nga zyra e kryetarit, drejtoritë komunale, zyrtarët komunal-shërbyesit civil dhe bashkëpunimi i mirë me qytetarët”, tha në fund Kilaj, duke i falënderuar të gjithë drejtorët e drejtorive për punën katërvjeçare