Këshilli për Trashëgiminë Kulturore të Qendrës Historike të Prizrenit vazhdon të mbetet pa mjete financiare, të cilat duhet t’i ndahen nga institucionet përgjegjëse. Ndonëse legjislacioni e përcakton se Komuna e Prizrenit duhet t’i ofrojë buxhet të caktuar këtij Këshilli, pasi që këto mjete i pranon nga niveli qendror, një gjë e tillë ende nuk ka ndodhur, shkruan Koha Ditore.
Si pasojë e kësaj situate, Këshilli ka mbetur me zyrë jofunksionale, nuk ka administrator, ndërkohë që as anëtarët nuk kompensohen për pjesëmarrje në takimet e këtij trupi.
“Komuna e Prizrenit, që prej themelimit të Këshillit për Trashëgiminë Kulturore të Qendrës Historike nuk ka ofruar kurrfarë buxheti për funksionimin e Këshillit. Madje as që ka komunikuar me Këshillin për këtë çështje”, ka thënë kryesuesi i Këshillit, Vesel Hoxhaj.