Fisnik Korenica, nga Grupi për Studime Juridike dhe Politike, një prononcim për Telegrafin ka thënë se liderët e së cilës parti politike në Kosovë, nuk duhet të refuzojnë një takim konsultues me presidenten e Kosovës, Atifete Jahjaga, nëse kjo e fundit e bën një ftesë për takim të përbashkët me liderët e subjekteve politike.
Sipas tij, pavarësisht faktit se presidentja e vendit nuk ka aq influencë sa që t’i detyroj liderët e partive për ta gjetur një zgjidhje për ngërçin politikë, “besoj se secili liderë duhet të ketë guximin të shkoj në një takim të përbashkët me shefen e shtetit”.
“Pastaj në një procedurë të zakonshme konsultimi, presidentja me liderët e partive politike, të tentojnë të gjejnë një gjuhë të përbashkët për sa i takon zhbllokimit të situatës politike. Bojkoti i një takimi të përbashkët, të ftuar nga presidentja e Kosovës, nuk mendoj që është i arsyeshëm, do të ishte shprehje kundër një versioni institucional të mënyrës sesi zgjidhen krizat institucionale sikurse kjo që e kemi pas zgjedhjeve të 8 qershorit”, ka thënë Korencia për Telegrafin.
Ai më tutja ka theksuar se “nëse presidentja e thërret një tryezë të përbashkët, ku do të uleshin liderët e të gjitha partive politike, kjo nuk do të duhej të shihet si nënshtrim i bllokut VLAN ndaj Partisë Demokratike të Kosovës (PDK), e as si heqje dorë e VLAN-it nga kërkesat e saj”.
“Shefja e shtetit, kërkesën për takim të përbashkët me liderët e partive, e bën në bazë të pozicionit të saj kushtetues. Kurrsesi e drejta për të thirrur këtë takim nuk paragjykohet në bazë të asaj se cila parti e ka shumicën. Prandaj besoj se refuzimi i secilës palë nuk është i logjikshëm, sepse askush nuk e ka të drejtën të refuzoj konsultimet me shefen e shtetit për sa i takon çështjeve të funksionimit të institucioneve”, ka thënë ai.
Ndërsa, i pyetur rreth zërave që po dëgjohen brenda Lidhjes Demokratike të Kosovës (LDK), e të cilët kërkojnë që të rishikohet marrëveshja në mes të bllokut VLAN, Korenica ka theksuar se deklarimet e disa deputeteve të LDK-së, të cilët kërkojnë rishikim të marrëveshjes, janë më shumë qëndrime personale në raport me ndarjen e tortës, respektivisht janë të pakënaqur me hisen që i takon LDK-së sipas marrëveshjes së bllokut VLAN.
“Qëndrimet e këtyre eksponentëve të LDK-së nuk duhet të shihen si qëndrime qe janë pro ndërtimit të qeverisë në mes LDK-së dhe PDK-së. Këto figura kanë të drejtë të bëjnë debat dhe të shprehin mendimin e tyre, edhe nëse ai nuk përshtatet me qëndrimin e partisë. Unë mendoj që ata (zërat kundërshtues brenda LDK-së), në mes të dy opsioneve – qeverisë së udhëhequr nga partia në pushtet dhe një qeverie të drejtuar nga blloku VLAN, do ta zgjidhin këtë të dytën”, ka thënë ai.