Përfaqësuesja e Kosovës ka fituar me rezultat minimal 1-0 në miqësoren ndërkombatare ndaj Madagaskarit.
Kosova ka shijuar fitoren ndaj Madagaskarit në ndeshjen miqësore të zhvilluar në Paris të Francës.
Kjo fitore erdhi në debutimin e trajnerit të ri, Bernard Challandes, ndërsa debutimin në këtë takim e pati edhe talenti Edon Zhegrova, i cili shënoi golin e fitores.
Pjesa e parë e takimit u përshkuan me pak raste shënimi, lojë të dobët, një gol të anuluar për Kosovën dhe një penallti e humbur nga Madagaskari.
Mundësitë më të mira për shënim, i pati kombëtarja e Madagaskarit, të cilët shpërdoruan një penallti në minutën e 35-të, goditje e cila qëlloi vetëm shtyllën pingule.
Në anën tjetër, Kosova arriti të gjej golin me anë të Vedat Muriqit, por goli u anulua për pozitë jashtë loje dhe skuadrat shkuan në pushim pa gola.
Në pjesën e dytë, përfaqësuesja jonë hyri furishëm duke gjetur shpejt edhe golin e parë të ndeshjes me anë të Edon Zhegrovës.
Talenti 18-vjeçar shënoi një supergol në minutën e 48-të për 1-0, gol që erdhi në debutimin e tij me fanellën e Kosovës.
Në vazhdim, Kosova arriti të luaj më mirë dhe të krijoj raste teksa e gjeti edhe një gol në minutën e 74-të me anë të Atdhe Nuhiut, por edhe ky gol u anulua nga gjyqtari.
Deri në fund të ndeshjes, Dardanët arritën mirë të menaxhojnë rezultatin dhe në fund morën një fitore të madhe me rezultat 1-0. /Telegrafi/