Kosova mund të ketë së shpejti qeverinë e re, që mund të jetë qeveri me bazë të gjerë. I ngarkuari me punë i Kosovës në Tiranë, Ramiz Lladrovci i tha “Ora News” se ngërçi politik në Prishtinë do të zgjidhet së shpejti. Që një diplomat del edhe në publik dhe jep vizionet e solucionet për kriza politike të brendshme- kjo i ngjet veç Kosovës.
“Do ta gjejmë një mundësi daljeje nga kjo situatë”, – tha Lladrovci, – “në mënyrë që Kosova të ketë një qeverisje, besoj unë dhe besoj se është në të mirë të Kosovës, një qeverisje me bazë të gjërë, pa përjashtuar asnjë parti. Unë besoj se do ta gjejnë një zgjidhje, liderët tanë dhe nuk do të lejojnë që Kosova të shkojë në zgjedhje të jashtëzakonshme pasi imazhi i Kosovës po vjen duke u zbehur dhe kemi një rëni të interesimit të ndërkombëtarëve për Kosovën përsa po e zgjasim këtë ngërç.”
Zoti Lladrovci pohoi se kriza e paszgjedhjeve parlamentare po e dëmton rëndë Kosovën. Ashtu siç e dëmton imazhi që një diplomat nuk do të duhej të bënte për vendin e tij: të flasë në publik për zhvillimet partiake!