Numri i vdekjeve te kosovarët po rritet nga viti në vit. Madje, ky numër nga viti 2015 e deri në vitin e kaluar është rritur për 1 mijë e 44 vdekje.
Prej 8 mijë e 202 vdekje sa ishin regjistruar për vitin 2015, në vitin 2016 janë regjistruar 9 mijë e 246 vdekje.
Kjo sipas raportit që ka publikuar Agjencia e Statistikave të Kosovës, në lidhje me statistikat e vdekjeve në Kosovë për vitin 2016.
Nga ky numër sipas kësaj agjencie del se 8 mijë e 495 vdekje që janë raportuar nga familjarët dhe janë regjistruar në Regjistrat Themeltar të vdekjeve kanë ndodhur në Kosovë, ndërsa 751 vdekje të tjera janë regjistruar që kanë ndodhur jashtë vendit.
Numër më i madh i vdekjeve vërehet tek meshkujt.
“Nga gjithsejtë vdekjet e raportuara të ndodhura vetëm në Kosovë, 4796 janë meshkuj apo 56.5 % dhe 3699 janë femra apo 43.5 % “, thuhet në raportin e ASK-së.
Prej këtyre rasteve, 46.3 për qind e tyre kanë ndodhur nëpër institucione shëndetësore, ndërsa 52.2 për qind kanë ndodhur në shtëpi dhe 1.2 për qind.
Numri i vdekjeve të dhunshme shqetësues
Janë gjithsej 188 raste apo 2.2 për qind e vdekjeve, që janë regjistruar si vdekje të dhunshme, qoftë nga fatkeqësitë, vetëvrasjet apo vrasjet.
Edhe pse ky numër është ulur në krahasim me vitin 2015, që ishin 199 apo 2.4 raste të vdekjeve të dhunshme, prapë shifrat mbeten shqetësuese.
Në raportin e ASK-së thuhet se prej 199 rasteve të vdekjeve të dhunshme, nga fatkeqësitë janë regjistruar 128 ose 68.1 për qind, vetëvrasjet 41 apo 21.8 për qind dhe vrasjet 19 ose 10.1 për qind raste të vdekjeve.
Mosha e cila dominon te vdekjet e dhunshme është 20 deri në 40 vjeç, tek të dyja gjinitë.
Edhe numri i foshnjave të vdekura ka pasur ulje për 35 vdekje.
Prej 238 foshnjave të vdekura sa ishin regjistruar në vitin 2015, ky numër në vitin 2016 është 199, shkruan Gazeta Fjala.
“Foshnjet e vdekura për vitin 2016 kanë qenë 199, dhe pjesëmarrja e tyre në gjithsej të vdekur është 2.3 %. meshkuj 116 apo 58.3 %, femra 83 apo 41.7 %”, thuhet në raportin e Agjencisë së Statistikave të Kosovës.
Prishtina me numrin më të madh të vdekjeve
Sipas Agjencisë së Statistikave të Kosovës (ASK), Komuna e Prishtinës prin me numrin më të madh të vdekjeve.
2 mijë e 696 raste të vdekjeve apo 29.2 për qind, janë regjistruar vetëm në këtë komunë, ndërsa Prizreni renditet pas saj me 908 raste apo 9.8 për qind dhe Peja me 573 apo 6.2 për qind.
Afro 80 për qind e të vdekurve janë të moshës 60 vjeç e më shumë.
Numri më i madh i vdekjeve është shënuar gjatë katër muajve të parë të vitit, ku janë shënuar 25.2 për qind të vdekjeve, ndërsa vetëm në muajin dhjetor janë shënuar 10.2 për qind e vdekjeve.
92.9 për qind e të vdekurve janë shqiptar dhe pjesën tjetër e përbëjnë pakicat. /Gazeta Fjala/