Kryetarja e Komisionit Qendror të Zgjedhjeve, Valdete Daka, pas kthimit nga Brukseli ku ka marrë pjesë në delegacionin e Prishtinës në bisedime me Beogradin, është përkujdesur që me anë të një raporti konfidencial t’i informojë anëtarët e KQZ-së për punën e bërë por edhe për pikat e planit që do të zbatohet gjatë organizimit të zgjedhjeve në veri.
Në këtë raport të dedikuar vetëm për anëtarët e KQZ-së e të cilin ka arritur ta sigurojë gazeta Tribuna, përshkruhen pikat se si duhet të koordinohen KQZ-ja me OSBE-në për mbarëvajtjen e procesit zgjedhor në komunat veriore të Kosovës. Në fillim të dokumentit, Daka informon anëtarët se në Bruksel ka qenë në cilësinë e ekspertit e jo të kryetares së KQZ-së.
“Qëllimi i këtyre takimeve ka qenë identifikimi i rolit të OSBE-së, lidhur me ndërmjetësimin e organizimit të zgjedhjeve lokale 2013. Dëshiroj të potencoj se roli im dhe i drejtoreshës së zyrës për regjistrimin e partive në takimet e Brukselit, ka qenë thjeshtë teknik, në cilësinë e ekspertit zgjedhor”, ka shkruar në raport Daka.