Jakup Krasniqi, në një intervistë për emisionin “Rubikon” në KTV, ka folur për shumë gjëra që janë duke ndodhur në Kosovë momentalisht.
Temë kryesore e diskutimit ka qenë subjekti i tij i ri, dhe largimi nga PDK. Krasniqi ka thënë se, megjithëse është një ndër themeluesit të PDK-së, kjo parti ka degraduar.
Ai ka përmendur edhe Iniciativat që janë formuar së fundmi, por ka thënë se ecja e tij politike nuk do të varet nga këto Iniciativa.
“Unë do të vazhdoj të mendoj se qytetarëve të Kosovës i duhet një organizim, që është më i përgjegjshëm dhe që nuk e ndjen veten që është i pozicionuar mirë, se ka kushte të mira, se partitë politike nuk formohen për të qenë në një pozitë të mirë kryetarët e partive”, është shprehur Krasniqi.
Kryekuvendari i Kosovës ka thënë se duhet të formohen parti “për të krijuar favore për të gjithë qytetarët, për të ngrit kualitetin e jetës për të gjithë qytetarët”.
“Ne mendojmë që në Kosovë duhet të bëhen ndryshime cilësore. Demokracia duhet të zhvillohet. Duhet të respektohen zgjedhjet e lira, dhe rezultati i atyre zgjedhjeve duhet të jetë vullneti i qytetarëve, e jo i komisionarëve”, u shpreh Krasniqi, citon Zëri.
Ai ka akuzuar partitë politike në skenën kosovare se nuk janë të gatshme të respektojnë sundimin e ligjit. “Pa zgjedhje të lira, pa sundim të ligjit… Kosova e ka vështirë për të krijuar një bazament të sigurt për tu integruar në strukturat euro-atlantike”.
Duke folur rreth organizimit të tij të ri politik, Krasniqi ka thënë se është bashkë me Fatmir Limajn.
“Realisht ne jemi bashkë, jemi duke biseduar me njerëzit”, ka thënë Krasniqi.
Ai ka thënë se nuk e di kur do të formojë subjektin e tij politik, duke pretenduar se do të formojnë një subjekt politik që do të jetë respektues i sundimit të ligjit.
Krasniqi ka thënë se ka shumë të interesuar për të ndryshuar skenën politike, si nga deputetët, ashtu edhe nga qytetarë tjerë.