Ministri i Kulturës, Rinisë dhe Sportit, Memli Krasniqi, priti sot në takim ekspertin amerikan të menaxhimit të artit, Martin Vinik, i cili po qëndron në Kosovë për një seri të ligjëratave mbi atë se si të rritet audienca e festivaleve dhe të organizohen aktivitetet kulturore në mënyrë sa më atraktive për të gjithë.
Ministri Krasniqi, e ka informuar ekspertin amerikan për organizimin institucional kulturor të vendit duke i shpjeguar edhe për jetën kulturore në përgjithësi që organizohet në Kosovë. Ai foli për infrastrukturën ligjore për këtë fushë si dhe për mbështetjen që shteti jep për kulturën. Në këtë kontekst ai përmendi se tashmë me ligj institucionet kulturore janë depolitizuar si dhe është rritur dukshëm buxheti për kulturën. Ministri tha se në Kosovë mungojnë kuadro të menaxhimit të artit. Ai tha se MKRS-ja po punon që të lidhë bashkëpunime me shumë shtete në mënyrë që të përfitojë dhe ngritë kuadro në fushën e artit.
Ministri e falënderoi ekspertin Vinik për shkëmbimin e përvojës dhe dijes së tij me njerëz të kulturës në Kosovë, me qëllim të përmirësimit të jetës kulturore në vendin tonë.
Ndërkaq, profesori i Universitetit të Kolumbias, Martin Vinik, e falënderoi ministrin për pritjen dhe informacionin që i ka dhënë atij për organizimin kulturor në përgjithësi ku potencoi se menaxhimi i artit kërkon një kujdes dhe tretman të veçantë, ku përfshihet edhe përkrahja institucionale. Ai ka treguar për përvojën e tij dhe modele të menaxhimit të artit, duke shprehur gatishmërinë që të vazhdojë të ndihmojë Kosovën me eksperiencën e tij. Martin Vinik ka mbajtur ligjëratë në Muzeun Etnologjik. Një të tillë do ta mbajë në Universitetin Amerikan me temën “Biznesi i artit dhe arti i biznesit” si dhe në Prizren në qendrën “Beledije” Vinik do të flasë për “Aktorët në trashëgiminë kulturore”./PrizrenPress.com/