Pjesë e koncertit nga krijimtaria e kompozitorit Feim Ibrahimi është dhe “E la tua veste e bianca”.
Krijimtaria e kompozitorit të shquar Feim Ibrahimi do të vijë për publikun përmes koncertit që do të zhvillojë Orkestra Simfonike RTSH, e cila do të drejtohet nga dirigjenti i njohur Ermir Krantja. Në koncertin në nder të kompozitorit Feim Ibrahimi “Artist i Popullit”, krijimtaria muzikore do të vijë dhe nën interpretimin e solisteve të njohura, si Emiljana Palushaj-soprano, Jonela Golemi në flaut dhe Etrita Ibrahimi në piano.
Koncerti pritet të zhvillohet mbrëmjen e datës 27 shkurt në skenën e Universitetit të Arteve, dhe është përzgjedhur një program i pasur muzikor. Pjesë muzikore që janë ndër më të njohurat nga krijimtaria e kompozitorit Feim Ibrahimi duke filluar që nga 1974 do të jenë pjesë e këtij koncerti, ndërsa hyrja për publikun është falas.
Ka fituar dy herë Çmimin e Republikës – çmimi më i rëndësishëm dhënë për veprimtari krijuese. Më 1990, në Aalto Theaterfoyer, në Essen (Gjermani), u organizua një koncert-portret, që përmbante edhe një leksion mbi muzikën e tij.
Në koncert do të interpretohet Valle Epike (1976), ku në emocionet e fuqishme që reflektojnë materialet kontraktuese e dramatike dhe në gjuhën e re muzikore, kuartat e kuintat bëhen protagonistet e një tingëllimi kombëtar, të freskët e modern për kohën.
Variacione mbi një temë popullore për flaut dhe orkestër (1976), janë tetë variacione ku alternohen elementët e muzikës popullore, me freskinë e virtuozismit të flautit, por edhe me gjuhën muzikore të një artisti i cili tashmë e kishte zgjedhur rrugën që do të ndiqte në vitet në vazhdim, atë të muzikës së re. Pjesë e koncertit nga krijimtaria e kompozitorit Feim Ibrahimi është dhe “E la tua veste e bianca”.
Pjesë e koncertit është dhe Koncert n. 2 për piano dhe orkestër (1974), që u prezantua për herë të parë në Dekadën e Majit më 1975, prezantimi i dytë ka qenë më 1995. Një pjesë që i detyron interpretuesit por dhe dëgjuesit të përballen me emocione të forta. Koncertit i bashkohet dhe suita në katër kohë nga baleti “Plaga e dhjetë e Gjergj Elez Alisë”, një pjesë që tërheq vëmendjen për simfonizëm të pastër dhe tingëllim të pasur në orkestër. / KultPlus.com