Deputetët e Kuvendit të Kosovës thonë se krejt ajo që mund të bëjë Kuvendi në fushën e ndikimit në Gjyqësi dhe Prokurori, për ta ndihmuar daljen nga kriza e kolapsit nga zhvillimet negative atje, madje edhe involvimin në fenomene korruptive, është adresimi i çështjeve konkrete gjatë shqyrtimit të raporteve vjetore të Këshillit Gjyqësor dhe Prokurorial të Kosovës
Ndonëse në kabinetin e Presidentes Jahjaga pushon në arkivin e harresës një letër e komisionarit për zgjerim, Sefan Fule, që adreson shqetësimet konkrete në krizën dhe mosfunksionimin e duhur të sistemit gjyqësor dhe prokurorial të Kosovës, legjislativi i vendit do t’i mbyllë sytë para kësaj letre dhe nuk preferon ta fusë në rend ditë një debat substancial, nga i cili do të mund të dilte një formulë adekuate e zgjidhjes së nyjës për funksionimin më të mirë të këtyre dy shtyllave kryesore të shtetit. Një debat i vetëm në Kuvendi, i cili mund të jetë temë e nxehtë e funksionimit të Gjyqësorit dhe të Prokurorisë së vendit mund të zhvillohet vetëm në mesin e vitit që vjen, me rastin e dorëzimit në Kuvend të raportit vjetor të punës së KGJK-së./KosovaSot/