Lexojeni letrën e vitit 2011, kur Kryeministri Thaçi kishte kërkuar nga Këshilli i Europës hetime për Raportin e Martyt.
Pak kohë pas miratimit të Raportit të Dick Martyt, në Këshillin e Europës, në formë rezolute, ishte bërë publike letra e Kryeministrit Hashim Thaçi që ia kishte drejtuar , Sekretarit Gjeneral të Këshillit të Europës, suedezit Thorbjorn Jagland, nga i cili kishte kërkuar hetime për akuzat e zviceranit.
Asokohe Thaçi kishte kërkuar nga të gjitha autoritetet kompetente, në veçanti nga EULEX-i, që të bëjnë gjithçka që është e mundur për të zbuluar se çfarë ka ndodhur”.
“Express”, e kishte siguruar letrën e vitit 2011 të Kryeministrit Thaçi me të cilën kishte kërkuar hapjen e hetimeve rreth akuzave të Martyt.
“Po ju shkruaj këtë letër si përgjigje ndaj raportit të Asamblesë mbi “Trajtimin Johuman të Njerëzve dhe Trafikimin Ilegal të Organeve Njerëzore në Kosovë” të përgatitur nga raportuesi i Asamblesë, senatori Dick Marty. Duke pasur parasysh se draft-raporti përmban një numër të akuzave serioze, unë besoj se këto pohime nuk duhet të mbeten pa përgjigje. Për këtë arsye, si qenie njerëzore dhe si Kryeministër i Republikës së Kosovës, shfrytëzoj rastin që t’u bëjë thirrje të gjitha autoriteteve kompetente, në veçanti EULEX-it, të bëjnë gjithçka që është e mundur për të zbuluar se çfarë ka ndodhur”, kishte shkruar Thaçi.
“Kështu që unë konsideroj se është e një rëndësie të madhe që hetimet të fillojnë sa më parë që është e mundur”, thuhej në letrën me firmën e Thaçit.
Kryeministri, i cili bashkë me figura tjera, që aktualisht janë në PDK, përmendet me emër në raportin e Martyt, kishte ofruar garanci për bashkëpunimin kur të bëhen hetimet.
“Për më tepër, unë fuqishëm ofroj të gjitha garancitë se Qeveria e Kosovës do të bashkëpunojë plotësisht në lidhje me hetimet e udhëhequra nga EULEX-i rreth këtyre pohimeve”, thuhej ndër të tjera në letër.