Kanë kaluar shtatë ditë nga shpallja e konkursit për Rektor në Universitetin e Prishtinës dhe ende asnjë kandidat nuk ka aplikuar për të marrë këtë pozitë. Zyrtarë të Rektoratit kanë treguar se deri në mesditën e së mërkurës në ndërtesën e Rektoratit e as në e-mail adresën zyrtare të këtij institucioni ende asnjë kandidat nuk ka dorëzuar aplikacionin për pozitën e Rektorit.
Por ekspertë të arsimit theksojnë se ende është herët për të thënë nëse do të ketë konkurrencë në Rektorat për pozitën e rektorit. Halim Hyseni, njohës i çështjeve të arsimit, shprehet se do të ketë konkurrencë në Universitetin e Prishtinës për këtë pozitë. Ai beson që gjatë ditëve në vijim do të ketë kandidat serioz të cilët do të kontribuojnë në mbarëvajtjen e mësimit në UP.
“Mendoj që gjatë kësaj periudhe të shkurtë aplikantët tashmë janë të bindur dhe kanë vullnet të bëjnë gjëra pozitive në UP. Kështu që besoj dhe shpresoj që do të ketë kandidat të cilët besoj që do të kontribuojnë që ky universitet të dal nga ky rreth vicioz”, ka thënë Hyseni./tribuna/