“Dashnori i nënës sime” me tekst të Adem Mikullovcit dhe regji të Ilirana Arifit, ishte premiera e cila u dha të mërkurën mbrëma në Teatrin Kombëtar të Kosovës.
“Dashnori…”, shfaqje e zhanrit komedi, arriti që gjatë tërë kohës ta mbajë vëmendjen e publikut i cili mbushi sallën. Të qeshura dhe duartrokitje përcollën shumë pjesë të shfaqjes, veçanërisht me paraqitjen e dy veteranëve të teatrit në skenën e cila i bashkoi pas 25 vjetësh.
Pjesë e shfaqjes ishin edhe Sheqerie Buqaj në rolin e Bukurisë, Ylber Bardhi në rolin e doktorit dhe Florentina Ademi në rolin e fqinjës, dhe Basri Shala. Shfaqja trajton një temë sociale, ku realiteti aktual në vend përshkon periudhën e transicionit në shoqëri.
Për regjisorin e dramaturgun Agron Gërguri, shfaqja e plotëson një kriter tek shkakton një të qeshur si nevojë fiziologjike, por jo edhe aq estetike. Sipas tij, teksti ka disa mangësi të cilat ka qenë e mundur të mbulohen.
Por për Mikullovcin nuk kanë shumë rëndësi kritikat që i merr. Sipas tij, matësi më mirë i një shfaqjeje është publiku.
“Me Lezën shumë herë kemi qenë partnerë në skenë dhe jemi të vetmit aktorë nga gjenerata e vjetër që jemi gjallë. Jam rikthyer me Lezen në skenë pas 25 vjetësh”, ka thënë Mikullovci, teksa me nostalgji ka folur për kohët e kaluara.
“U ndjeva sikur të nisja nga fillimi. Ndoshta edhe do të vazhdoj akoma e njerëzit mendojnë që kjo është e fundit, por kurrë nuk i dihet”, ka thënë Qena, shkruan Koha Ditore.
Dramaturgu Arian Krasniqi veçon dy aspekte të shfaqjes “Dashnori i nënës sime”. Sipas tij, shfaqja nuk është e ngarkuar me filozofi, trajton një temë sociale që përkon me realitetin.
“Ky tekst, i zhanrit komedi, është shkruar nga një autor vendor, dhe u pa se ka komunikuar lehtësisht me publikun, dhe së dyti, për arsyen që kjo shfaqje u dha mundësinë dy aktorëve doajenë të skenës: Leze Qena dhe Adem Mikullovci që të këtë partneritet skenik me njëri-tjetrin të na sjellin role interesante”, ka thënë Krasniqi.