Aleanca për Ardhmërinë e Kosovës(AAK) është përçarë në Prizren. Një pjesë e Kryesisë së Degës së këtij subjekti politik në këtë qytet, ka kohë që nuk e kanë shkelur as pragun e zyrës së partisë.
Ata janë të pakënaqur me emërimin e ish-kryetarit të LDD-së Lulëzim Kabashit, në postin e kryetarit të Degës së AAK-së.
Burimet e sigurta të “PrizrenPress”-it brenda AAK-së në Prizren, bëjnë të ditur se emërimi i Lulëzim Kabashit në postin e kryetarit të Degës, nuk është mirëpritur nga një pjesë e Kryesisë dhe anëtarëve të AAK-së.
“Ardhja e Lulit në postin e kryetarit ka shkaktuar përçarje të madhe. Shumë anëtarë të Kryesisë, por edhe anëtarë të tjerë të AAK-së janë zhgënjyer me këtë emërim, që ka bërë kryetari Ramush Haradinaj”, tregon burimi i “PrizrenPress”-it.
Lulëzim Kabashi ka qenë kryetar i Degës së LDD-së në Prizren. Ai në zgjedhjet lokale të vitit të kaluar nga koalicioni AAK-LDD, ka qenë kandidat për kryetar të Prizrenit.Pas humbjes së zgjedhjeve, Kabashi në balotazh pat lidhë koalicion me PDK-në për të përkrahur Ramadan Mujën për kryetar të Prizrenit.
Edhe pse subjekti i tij politik(LDD) nuk kishte fituar asnjë ulëse në Asamblenë Komunale, Kabashi është shpërbëlyer me postin e nënkryetarit të parë të Komunës së Prizrenit. Ky shpërblim i Kabashit, kishte shkaktuar pakënaqësit e para brenda Degës së AAK-së në Prizren, pasi që vendimi ishte marrë nga lideri i këtij subjekti politik, Ramush Haradinaj në Prishtinë.
Pak ditë pas emërimit në postin e nënkryetarit të Komunës,Kabashi është emëruar nga Haradinaj edhe në krye të Degës së AAK-së në Prizren.Emërimi i tij është bërë pa iu nënshtruar votës së anëtarëve të partisë.
Ky veprim i Haradinajt ka krijuar pakënaqësi të madhe brenda AAK-së në këtë qytet. Një pjesë e Kryesisë dhe anëtarëve të revoltuar nuk kanë shkuar në zyrën e partisë. Sipas burimeve të “PrizrenPress”-it, ata janë duke shikuar mundësit, që aktivitetin e tyre ta zhvillojnë me ndonjë subjekt tjetar politik.
Dr. Feim Mazrreku në zgjedhjet lokale të nëntorit të vitit të kaluar, ka qenë kandidat i AAK-së për Asamblenë Komunale të Prizrenit. Ai në ditën e themelimit të subjektit më të ri, NISMA Për Kosovën në Prizren, është parë në shoqërim me ekipin dhe kryetarin e NISMËS, Fatmir Limajn.
Mazrreku nuk ka pranuar të flasë se a është bërë apo jo pjesë e këtij subjekti të ri politik.Ai ka pranur të tregojë se më nuk është në AAK.
“ Nuk jam me asnjë subjekt politik. Në tubimin e Limajt kam qenë sepse ata i kam miq të vjetër”, ka thënë shkurt Mazrreku për “PrizrenPress”.
“Por, ti mos u merr me këtë punë”.
Aleanca për Ardhmërinë e Kosovës(AAK) në Prizren, ka qenë subjekti i vetëm politik në këtë qytet, që ka funksionuar pa fraksione dhe përçarje të brendshme.Sipas burimeve të “PrizrenPress”-it, përçarja e Degës së AAK-së në Prizren, do të ndikojë negativisht në zgjedhjet nacionale, që pritet të mbahen këtë vit nëse nuk intervenon lideri Ramush Haradinaj. /PrizrenPress.com/