Ditën kur në Tiranë dhe në periferitë e saj u rreshtuan 1500 forca policore, të cilat gjendeshin me të vërtetë në çdo cep të kryeqyetit dhe ndërkohë që një helikopter ushtarak mbikëqyrte të gjithë territorin, nuk ka qenë e vështirë që të ndodhte gjithsesi një krim i rëndë.
Kryeqyteti e ka pritur me një vrasje të dyfishtë kryeministrin e Serbisë, pasi pranë Fakultetit të Shencave të Natyrës, ose maternitetit “Mbretëresha Geraldinë”, ka patur një konflikt me armë, nga i cili mësohet se kanë mbetur të vdekur dy persona.
Edhe pse vendi i krimit ndodhet disa qindra metra larg nga Kryeministria dhe Kuvendi, ku qe për vizitë Vuçiç sot, policia, Garda dhe anti-terrori nuk kanë mundur ta parandalojnë ngjarjen tragjike.
Paraprakisht dyshohet se kemi të bëjmë me një përplasje mes dy grupeve, pasi siç shihet nga pamjet, trupat e dy të vdekurve gjenden në krahe të kundërta, njëri në rrugë pranë Fakultetit të Shkencave Natyrore dhe tjetri në krahun e Maternitetit në trotuar.
Mësohet se autorët kanë ndjekur me makinë viktimat dhe u kanë prerë rrugën.
Ndërkohë personi i tretë që ka mbetur i plagosur është transportuar në gjendje të rëndë drejt spitalit të Traumës për marrjen e ndihmës mjekësore.
Forca të shumta policie kanë rrethuar zonën.