Kryetari i Komunës së Prizrenit Ramadan Muja dhe sekretari i Ministrisë së Kulturës Rinisë dhe Sportit Veton Firzi, kanë nënshkruar të premten dy marrëveshje mirëkuptimi, për investim në dy objekte: poligonin sportiv në lagjen Kurrilla të Prizrenit dhe adaptimin e objektit të Bashkësisë hebraike.
Kryetari i Komunës tha se nga të dy këto marrëveshje do të përfitojnë qytetarët e Prizrenit.
“Poligoni sportiv për banorët e lagjes Kurrillë, do të jetë një objekt funksional, i cili do të shfrytëzohet nga pjesëtarët e rinisë së kësaj lagjeje. Në marrëveshje parashihet që MKRS të investojë 60 mijë euro ndërsa komuna participon me 5 mijë euro” u shpreh Muja.
Kryetari Muja e falënderoi MKRS-në ndërsa njoftoi se objekti do të ndërtohet gjatë vitit 2017 dhe vitit 2018 kur do ti dorëzohet në shfrytëzim lagjes.
Marrëveshja e dytë e nënshkruar është investimi i MKRS-së për adaptimin e objektit, të cilin komuna e Prizrenit ia ka dhënë Bashkësisë hebraike.
“Objekti ka nevojë që brenda të adaptohet, rregullohet dhe të funksionalizohet për zhvillimin e aktiviteteve të pjesëtarëve të Bashkësisë hebraike në Prizren” tha Muja, shkruan gazetaere.
Sekretari i MKRS-së Veton Firzi, njoftoi se përveç këtyre dy marrëveshjeve MKRS-ja e ka hapur procedurën e fazës së dytë për ndërtimin e stadiumit ndihmës në Boka Boka, i cili do të jetë me përmasa të kategorisë që përcaktohet nga UEFA, ndërsa gjithashtu njoftoi se për stadiumin “Përparim Thaçi” gjithashtu nga MKRS do të ndahet një shumë më e vogël e mjeteve gjatë këtij viti, ndërsa në vitin e ardhshëm do të ndahet shumë më e madhe.