Ministria e Brendshme do të duhet t’ia paguajë mbi 113 mijë euro një kompanie gjermane të municionit. Vonesa e pranimit të një sasie municioni në vitin 2010 i ka kushtuar Ministrisë së Brendshme me një padi në gjyq nga e cila është e detyruar që kompanisë “Nowar Security Equipment GMBH” nga Gjermania t’ia paguajë shumën prej 113 mijë e 327 euro,shkruan Tribuna
Kështu kishte vendosur Gjykata Ekonomike e Prishtinës në vitin 2011 e në dhjetor të vitit që shkoi këtë vendim e ka konfirmuar edhe Gjykata e Apelit. Në këtë të fundit ishte ankuar e paditura Ministria e Punëve të Brendshme e cila kishte pretenduar se është vendim jo i drejtë dhe janë shkelur procedurat e dispozitave ligjore. Pasi e ka shqyrtuar ankesën Gjykata e Apelit ka vendosur në favor të kompanisë gjermane e cila në këtë rast ishte në cilësinë e paditësit.
Kompania në fjalë dhe MPB kanë lidhur kontratë në shtator të vitit 2009 për furnizim me municion pasi që deri në shpalljen e Pavarësisë së Kosovës këtë të drejtë e kishte vetëm UNMIK-u. Afati për liferimin e mallit ishte më 30 nëntor të atij viti me obligim që kompania ta lajmërojë Ministrinë tri ditë para arritjes së mallit.