Me rastin e manifestimit tradicional “ Epopeja e UÇK-së”, janë nderuar dëshmorët e Komunës së Prizrenit, me ç’rast janë bërë homazhe dhe janë vendosur buqeta lulesh.
Familjarë të dëshmorëve, veteranë dhe invalid të luftës, qytetarë dhe zyrtarë të institucioneve të ndryshme, ishin të pranishëm sot në Landovicë, për të bërë homazhe në nderim të jetës dhe veprës së dëshmorëve me rastin e manifestimit tradicional “ Epopeja e UÇK-së”.
Me këtë rast, Ramadan Muja, tha se dëshmorët me aktin e tyre të flijimit i dëshmuan Botës mbarë se si duhet çliruar e njëkohësisht edhe mbrojtur atdheu, ndërsa ne duhet të angazhohemi që të zhvillojmë shtetin tonë, për të cilin është derdhur aq shumë gjak.
Ndërkaq, eprori i njësisë së dominimit të FSK-së në Prizren, kapiten Sejdi Krasniqi, tha se asnjëherë nuk duhet harruar bijtë më të shtrenjtë të Kosovës, të cilët nuk kursyen asgjë nga vetja, që ne sot të shijojmë Lirinë .
Pas Landovicës, janë bërë homazhe nga pjesëmarrësit e këtij aktiviteti edhe para Monumentit të Lirisë , ku janë të gdhendur emrat e të gjithë dëshmorëve të rënë për Lirinë e Kosovës nga komuna e Prizrenit/TV Prizreni/