Oficeri për Politika dhe Plane të NATO-s, Andrew Cullen, ka bërë me dije se NATO-ja është duke përcjell nga afër zhvillimet në Ministrinë e Forcës së Sigurisë së Kosovës.
Ai gjatë një takimi me ministrin Haki Demolli, ka thënë se NATO-ja është e kënaqur me zhvillimin, profesionalizimin dhe gatishmërinë operacionale të Forcës së Sigurisë së Kosovës (FSK) në përgjigje të situatave, të cilat i ka në kuadër të misionit.
Në njoftimin e MFSK-së, është thënë se oficeri Cullen ka shprehur interesimin për planet për zhvillimin e FSK-së në të ardhmen, si dhe ka premtuar përkrahje të vazhdueshme për zhvillimin, profesionalizimin dhe hapjen e perspektivave të reja për FSK-në dhe sigurinë në përgjithësi në Kosovë.
Kjo është vizita e parë për këtë vit e Andrew Cullenit në Ministrinë për Forcën e Sigurisë së Kosovës, ndërsa e dyta pas asaj të dhjetorit, që prej se ai ka marrë këtë detyrë në muajin tetor të vitit të kaluar.