Ka ndërruar jetë në moshën 66-vjeçare Dr. Bajram Bajrami, një prej mjekëve më të përkushtuar dhe të respektuar të Spitalit të Përgjithshëm “Prim. Dr. Daut Mustafa” në Prizren.
Ai u largua nga jeta të enjten, më 29 maj 2025, duke lënë pas një trashëgimi të çmuar profesionale dhe njerëzore.
I lindur më 17 mars 1959 në fshatin Novosellë, Dr. Bajrami përfundoi Fakultetin e Mjekësisë dhe më pas specializimin në Mjekësi Interne. Karrierën si mjek e nisi në vitin 1984 dhe qëndroi në shërbim të pacientëve deri në pensionimin e tij më 17 mars 2024.
Gjatë gjithë jetës profesionale, ai njihej për përkushtimin, korrektësinë dhe humanizmin në trajtimin e pacientëve.
“Dr. Bajram Bajrami ishte një koleg i dashur, profesionist i përkushtuar dhe njeri i jashtëzakonshëm. Ai ka lënë pas një trashëgimi të fortë të humanizmit dhe përkujdesjes ndaj të sëmurëve”, thuhet në një deklaratë nga Spitali i Përgjithshëm “Prim. Dr. Daut Mustafa” në Prizren.
Menaxhmenti, Reparti i Sëmundjeve të Brendshme, ku ai punoi për dekada, dhe gjithë stafi i spitalit kanë shprehur ngushëllimet më të sinqerta për familjen, miqtë dhe kolegët e tij.
“Kujtimi për jetën dhe punën e Dr. Bajram Bajramit do të mbetet i gjallë në zemrat e të gjithë atyre që patën nderin ta njihnin dhe të punonin me të”./PP/
Marketing
Kliko videon: https://www.facebook.com/PrizrenPress/videos/1684680412412465
