Ndërron jetë në moshën 94 vjeçare, albanologu i shquar profesor Shaban Demiraj. Profesor Shaban Demiraj, lindi në Vlorë, por për shumë vite jetoi dhe punoi në Tiranë.
Ai ka qenë kryetar i akademisë së shkencave në vitin 1992, ndërsa për 30 vjet drejtoi katedrën e Gjuhës Shqipe, ka shkruar mjaft vepra për gjuhën shqipe, ndër të cila edhe 8 monografi, studime për fonetikën, morfologjinë dhe sintaksën historike të gjuhës shqipe. Ai është figurë e njohur për shkencën gjuhësore në Ballkan e Evropë dhe për kontributin e shquar, ka mbajtur titujt “mësues i popullit dhe mjeshtër i madh i punës”.
Kryetarja e këshillit bashkiak të Vlorës Evis Alushi shprehu ngushëllimet në emër të këshillit, duke e cilësuar vdekjen e profesor Demiraj një humbje e madhe për shkencën shqiptare dhe për Gjuhën Shqipe. Alushi bëri të ditur se do propozohet që emri i profesorit, t’i vendoset një rrugë ose një sheshi në qytetin e Vlorës.