Qindra qytetarë protestuan kundër arrestimit të komandantit të UÇK-së Xhemshit Krasniqi.
Marshi protestues i organizuar nga shoqatat e dala nga lufta dhe Parlamenti Studentor i Universitetit të Prizrenit filloi në orën 12:00 në sheshin e UÇK-së që ndodhet në rrethin e Spitalit Rajonal të Prizrenit dhe vazhdoi drejt sheshit “Shatërvan”.
Nehat Gashi nga Parlamenti Studentor i Universitetit të Prizrenit paralajmëroi se marshi i sotëm nuk do të jetë aktiviteti i vetëm
“Flas edhe në emër të rinisë në Prizren, e po ashtu edhe në emër të gjithë qytetarëve të Prizrenit se ne nuk do të ndalemi asnjëherë dhe për asnjë moment deri në lirimin e tij (Xhemshit Krasniqit),” tha Gashi.
Në emër të këshillit organizativ të shoqatave të dala nga lufta dhe familjes së Krasniqit foli Isa Berisha.
“Shumë dëshmitarë që ishin bashkëpunëtorë të Serbisë, së bashku masakruan, dogjën dhe e vranë me dekada këtë popull dhe sot ende flasin dhe shëtisin lirisht brenda dhe jashtë Kosovës, duke shpifur me akuza të pavërteta ndaj çlirimtarëve dhe abuzojnë me realitetin në Kosovë. Ata janë individë të mbrojtur, të garantuar dhe të stimuluar nga vetë EULEX-i,” tha Berisha.
Me fjalimin e tij u përmbyll marshi protestues. Në marsh u panë edhe përfaqësues nga partitë politike si të pozitës, po ashtu edhe të opozitës.
Xhemshit Krasniqi u arrestua më 6 tetor nën dyshimet për krime lufte, ndërsa një ditë më pas atij iu caktua paraburgimi prej 30 ditësh./Kallxo.com/