I burgosuri F.M dyshohet se e ka rrahur me grushte dhe e ka bërë gati për doktor, punëtorin e Shërbimit Korrektues të Kosovës në Qendrën e Paraburgimit në Prizren. I rrahuri është S.B, i cili në këtë qendër punon si mbikëqyrës i ujësjellësit dhe rrymës.
Gazeta Tribuna ka mësuar nga burime brenda kësaj qendre se gjithçka ka ndodhur të enjten pasdite rreth orës 16:00. Pas interesimit të gazetës, incidenti konfirmohet tërthorazi edhe nga Shemsi Hajrizi, ushtrues i detyrës së Shërbimit Korrektues të Kosovës.
“Incidenti ka qenë verbal, jo më i rëndë”, thotë Hajrizi për Tribunën. Megjithëkëtë, Hajrizi tha se ka urdhëruar hetim deri në fund të rastit për të cilin gazeta është interesuar. Kurse zyrtarë të Policisë së Kosovës në Prizren nuk kanë ndonjë informacion se ka pasur rrahje të tillë.