Qamile Rexha, nëna e komandant “Drinit”, e ka një lutje për ditën e vdekjes së saj.
Lutja e saj dëshiron të realizohet vetëm nëse i zbardhet vrasja e djalit.
“Unë them se nëse gjendet kush e vrau, ju lus asnjë lot për mua mos e derdhni ditën kur vdes. Veç të gjendet kush e vrau,” shprehet nëna Qamile.
Në Prizren, dje u shënua 18-vjetori i vrasjes së Ekrem Rexhës, i njohur në luftën për çlirimin e Kosovës si komandant “Drini”
“Drini” u vra para shtëpisë së tij në lagjen “Bazhdarhane” në rrethana misterioze, në mëngjesin e 8 majit të vitit 2000, në kohën kur po punonte si drejtor komunal për Emergjencë, shkruan “PrizrenPress”.
Në momentin kritik ai kishte dalë të ndezte veturën për të shkuar në punë, ndërsa ishte qëlluar me armë automatike, derisa po shikonte gomën e parë të veturës, nga ana e shoferit që ishte shpuar qëllimisht.
Për zbardhjen e vrasjes, nën drejtimin e ndërkombëtarëve në Prizren janë mbajtur dy procese gjyqësore, por në mungesë provash, të akuzuarit, ish-pjesëtarë të UÇK-së, por edhe ish-shokë të “Drinit”, janë liruar.
Procesi për të zbardhur vrasjen më vonë u zhvendos në Prishtinë, ku në një proces tjetër me drejtësinë u përball ish-komandanti i Zonës së Dytë të TMK-së, gjeneral Sali Veseli, që ishte akuzuar për bashkëpunim në vrasje. Shkalla e dytë e Gjykatës e pat prishur aktgjykimin e Gjykatës në Prizren, ndërsa siç është thënë në mungesë provash liroi të akuzuarit.
Komandant “Drini” ka themeluar Shoqatën e Veteranëve të Luftës në Prizren, që ishte e para e këtillë në vend.
Nëna Qamile, tregon ndërkaq se Ekremi ishte më i miri djalë.
“Jemi krenarë që e patëm, por ja na e vranë”.
“Ekremi nuk u ndal kurrë duke bërë luftë për lirinë e Kosovës”, tha ajo për “Kosova Sot”.
Njëri nga tre vëllezërit e komandant ‘Drinit’, Ruzhdi Rexha, kërkon zbardhjen e vrasjes së vëllait të tij.
Ai, tha se një kërkesë të tillë e kanë edhe bashkëluftëtarët e “Drinit”.
“Ne kemi pasur dhe kemi dëshirë që kjo vrasje të zbardhet nga organet tona. Ne ua kemi lënë institucioneve të drejtësisë që të zbardhin këtë vrasje. Për ne është e rëndësishme që të zbardhet vrasja, pavarësisht se kush e bënë vendorë apo ndërkombëtarë“, shprehet ai. /PrizrenPress.com/