Të paktën nëntë persona kanë humbur jetën dhe dhjetëra të tjerë janë zhdukur në Gjermani pasi shirat e rrëmbyer i kthyen rrugët në përrenj të furishëm, duke marrë përpara makinat dhe duke shkaktuar shembjen e disa ndërtesave.
Policia në qytetin perëndimor të Koblenzit ka njoftuar të enjten se katër persona kishin vdekur në qarkun Ahrweiler dhe rreth 50 ishin bllokuar në çatitë e shtëpive të tyre në pritje të shpëtimit.
Autoritetet kanë shpallur një emergjencë në rajon pas ditësh reshje të mëdha shiu.
Pjesë të mëdha të Gjermanisë perëndimore dhe qendrore, si dhe vendet fqinje kanë pësuar dëme të mëdha.
Shirat e pamëshirshëm gjatë natës përkeqësuan kushtet e përmbytjes edhe në Belgjikën lindore, ku një person u raportua i mbytur dhe të paktën një tjetër ishte zhdukur.