Rrjedha e konkursit të shpallur nga Komuna e Prizrenit për pranimin në punë të dhjetëra mësimdhënësve mbetet i paqartë pas vendimit të Gjykatës Kushtetuese për pezullimin e zbatimit në tërësi të Ligjit për Zyrtarët Publikë.
Drejtuesit e Arsimit në Komunën e Prizrenit deri në momentin e raportimit nuk kanë dhënë sqarime për gazetën se si do të procedohet tutje me konkursin pas vendimit të Kushtetueses lidhur me Ligjin për Zyrtarët Publikë, shkruan Koha Ditore.
Ndërkohë eksponentë të caktuar të partive opozitare kanë vlerësuar se vendimi i Kushtetueses rreth Ligjit për Zyrtarët Publikë e bën të pavlefshëm konkursin për mësimdhënës të shpallur nga Komuna e Prizrenit.
Komuna e Prizrenit më 4 nëntor 2019 ka publikuar konkursin për pranimin në punë të dhjetëra mësimdhënësve, ku, pos tjerash, u është referuar edhe dispozitave të Ligjit për Zyrtarët Publikë. Ndërsa më 11 nëntor 2019 është bërë plotësim-ndryshimi i konkursit për disa vende të punës.
Në konkursin e publikuar në uebfaqen e Komunës shkruan se i njëjti ka qenë i hapur deri më datën 18 nëntor 2019.
Por Gjykata Kushtetuese më 19 nëntor 2019 ka njoftuar se në bazë të kërkesës së parashtruar nga Avokati i Popullit ka marrë vendim për masë të përkohshme në raport me Ligjin për Zyrtarët Publikë.