Gjykata Themelore në Prizren, ka caktuar një muaj paraburgim për pjesëtarin e Policisë së Kosovës, Besnik Mazrekut dhe dy të dyshuarëve të tjerë për keqpërdorim të detyrës dhe ryshfet.
“Gjykata Themelore në Prizren, ka marr Aktvednim për caktimin në kohëzgjatje prej një muaj paraburgim për tre të dyshuarit për keqpërdorim të detyrës zyrtare dhe marrjes së ryshfetit”, tha zëdhënësja e Gjykatës Themelore në Prizren, Afërdita Kicaj
Inspektorati Policor i Kosovës “pas një hetimi intensiv”, të shtunën ndërmori një operacion bastisjeje në tri lokacione të ndryshme, në Prizren dhe Suharekë.
Operacioni i bazuar në planin operativ të koduar me emrin “Autoriteti”, ka rezultuar me arrestimin e tre personave me dyshimin e bazuar se kanë kryer veprat penale: keqpërdorim i pozitës apo autoritetit zyrtar, marrje e ryshfetit, dhënie e ryshfetit dhe ushtrim të ndikimit.
Një nga të dyshuarit e arrestuar është pjesëtar i Policisë së Kosovës, me detyrë në Drejtorinë për hetimin e trafikimit me narkotikë – njësia në Prizren,Besnik Mazreku.
Me autorizim të Prokurorisë Themelore në Prizren, fillimisht personave të dyshuar iu është caktuar masa e ndalimit policor prej 48 orësh, deri në vazhdimin e procedurave të rregullta gjyqësore. Zyrtari policor tashmë i arrestuar është suspenduar.
“Besnik Mazreku, zyrtar i Policisë në Drejtorinë për Hetimin e Trafikimit me Narkotikë të Policisë së Kosovës, dyshohet se ka bërë vepër penale, keqpërdorim të pozitës apo autoritetit zyrtar nga neni 422 par.1 të KP, marrja e ryshfetit nga neni 428 par.2 të KP, ushtrimi i ndikimit nga neni 431 par.1 të KP dhe veprës penale, mbajtja në pronësi, kontroll, ose posedim të paautorizuar të armëve naga neni 374 par.1 të KP”.
“Naser Koçinaj për shkak të veprës penale ushtrimi i ndikimit nga neni 431 par.2. të KP, dhe dhënia e ryshfetit nga neni 429 par.2.të KP”.
“Liridon Bajraktari, për shkak të veprës penale dhënia e ryshfetit nga neni 429 par.2.të KP, ushtrimi i ndikimit nga neni 431 par.2.të KP”.
Veprimet e tilla, IPK-ja ndërkaq thotë se i ndërmori duke u bazuar në urdhëresën e Prokurorisë Themelore në Prizren.
Ky aksion përveç arrestimeve ka rezultuar edhe me konfiskimin e dy armëve të gjata, disa pajisjeve kompjuterike, dokumente të ndryshme etj./PrizrenPress.com/