Edhe pse është shtruar para gjashtë vjetësh, rruga “Themistokli Gërmenji” në Qendrën Historike të Prizrenit është dëmtuar në dy vjetët e fundit.
Rruga ndodhet në Zonën e Parë Mbrojtëse të kësaj qendreje, ndërsa banorët tregojnë se komuna nuk po e rregullon atë.
Nue Prenqi, banor i lagjes, thotë se bashkë me fqinjët e tij është ankuar në Komunën e Prizrenit.
“Na kemi qenë me shokët e mi të mahallës, kena shku në komunë këtu në Prizren, kena lajmëru për rrugë. Na kanë thënë shkoni te filani, na kanë dhënë edhe emrin tash s’ po më kujtohet, na kanë thënë peticion me bo, i kemi marrë krejt nënshkrimet po prapë kurrfarë përgjigje,” thotë Nue Prenqi.
Pjetër Prenqi, banor i moshuar i “Themistokli Gërmenjit” i frikohet më shumë dimrit që po vjen, me rrugën në këtë gjendje.
“Na ju lusim të gjithëve me na ndihmu për këtë rrugë se shumë kerre kemi, e rruga është e lujtme. Shihe këtu është shembur pak, përpara kështu ka qenë te ky kojshia tash ka dalë këndej e andej. Aman ju lutem se kena kerre shumë, e rruga është e prishtë,” thotë Pjetër Prenqi.
Taksisti Sami Maqkaj që nëpër këtë rrugë kalon nga 4-5 herë në ditë, thotë se gjatë dimrit ajo bëhet e pakalueshme.
“Faqja e zezë, kurrë ma keq s’ janë kanë, kurrë! Asnjë lagje çka ekziston nuk është ma keq se kjo,” thotë Maqkaj.
Zëdhënësi i Komunës së Prizrenit, Ymer Berisha, thotë se komuna është e gatshme të ndërhyjë për rregullim të rrugës “Themistokli Gërmenji” por mund t’i paraqet problem fakti se kjo rrugë është pjesë e Qendrës Historike.
“Duhet parë se cila është kërkesa, sa është emergjente ajo dhe ne absolutisht jemi në shërbim të qytetarëve, por po them se qytetarët do t’ i ndihmojnë vetes edhe neve që të bisedojnë me komisionet e Zonës së Parë të Mbrojtur dhe absolutisht jemi të gatshëm të jemi bashkë me shqetësimet e këtyre qytetarëve dhe ta zgjidhim këtë problem,” thotë Berisha.
Përfaqësuesi i banorëve të kësaj rruge Nue Prenqi thotë se nëse rruga nuk rregullohet politikanët nuk mund të shkojnë më aty as për vota.
“Si banorë, kërkesa jonë është me ardhë me e ndreqë, qe nuk vinë ata, na e ndreqim vetë, e prishim krejt, i hijmë me tarrakop e prishim krejt, s’ ka nevojë me ardhë komuna mo, edhe mos të na lypin vota se nuk i japim vota kërkujna mo,” shpreh mllefin ai. /Kallxo.com