Lidhja Demokratike e Kosovës (LDK) nuk e ka ndërmend të merret me letrën e hapur që sot gjatë ditës lideri i Aleancës për Ardhmërinë e Kosovës (AAK), Ramush Haradinaj, ia ka dërguar prokurorit të shtetit, Ismet Kabashi.
Siç dihet tashmë, Haradinaj, beson se iu ka bërë e padrejtë kur është akuzuar se “ka gisht” në vrasjet e anëtarëve të LDK-së pas luftës, sikurse edhe karshi akuzave për haraq.
Nëpërmjet një letre të gjatë, ai ka kërkuar nga Prokurori që t’i trajtojë sa më shpejtë që të jetë e mundur të gjitha rastet kur është atakuar, në mënyrë që të “zbardhet e vërteta”.
Deputetja e LDK-së, Vjosa Osmani, ka deklaruar për Indeksonline se kjo parti nuk merret me letrën e Haradinajt, ngase, secili komentim i kësaj çështje, sipas saj, do të ishte përfshirje në punët e Prokurorisë.
“Është çështje e Prokurorisë, dhe në asnjë mënyrë në nuk duam të ndërhyjmë. Secila deklaratë e imja apo e zyrtarëve të tjerë politik mund të cilësohet si ndërhyrje politike në punën e Prokurorisë”, tha Osmani.
Sipas saj Prokuroria duhet të bëjë punën e vet dhe nëse ka arsye për hetim ata do t’a bëjnë.
“Nëse Prokuroria ka arsye për hetim ata mesiguri se do të bëjnë punën e tyre. Nuk na takon neve të përzihem në punë të drejtësisë”, deklaroi ajo.
Para disa ditëve Gazmend Muhaxheri nga Lidhja Demokratike e Kosovës, njëherit edhe kryetari i ri i Komunës së Pejës, pati akuzuar partinë e Haradinajt për vrasjet e pasluftës në Rrafshin e Dukagjinit.