Kryetari i Organizatës së Veteranëve të Luftës së Ushtrisë Çlirimtare të Kosovës (OVLUÇK), Smajl Elezaj, ka thënë se organizata që ai drejton e ka mirëpritur nisjen e procedurave për hetimin e listave të veteranëve të UÇK-së.
Ai ka rikujtuar se OVLUÇK-ja para një viti dhe tash së fundmi para dy jave, ka kërkuar një hetim të tillë nga prokuroria.
“E mirëpresim hetimin e Prokurorisë së Shtetit. Siç e dini, Organizata e Veteranëve të Luftës së Ushtrisë Çlirimtare të Kosovës (OVLUÇK) i ka bërë thirrje para një viti dhe po ashtu edhe para dy jave, Prokurorisë së Shtetit që ta hetojë këtë proces, sepse diçka nuk është në rregull me verifikimin e veteranëve”, ka thënë për gazetën “Epoka e re” Elezaj.
Duke pasur parasysh se Prokurorisë së Shteti do t’i duhet një punë disavjeçare, Elezaj ka thënë se më mirë do të ishte të krijohet një komision i ri dhe më gjithëpërfshirës për rishikimin e listave të veteranëve.