Në fillim të këtij muaji, më shumë se 20 mjekë-stomatologë nga rajoni i Prizrenit kishin konkurruar për një konkurs për tri pozita, në lagjen “Bajram Curr”, në fshatin Korishë dhe në fshatin Romajë të Hasit.
19 stomatologët që thonë se u është bërë e padrejtë në mospërzgjedhjen e tyre, kanë bërë ankesë në organet kompetente të kësaj komune. Ata po ashtu kanë nënshkruar edhe një peticion kundër vendimit të komisionit të formuar nga Drejtoria e Shëndetësisë në Prizren, raporton KTV. Stomatologët Fejzë Kabashi dhe Krenar Gashi pohojnë se ky komision nuk ka qenë kredibil për të bërë përzgjedhjen e duhur. Ata thonë se u është bërë e padrejtë, pasi që nuk janë dhënë mundësi ankese pas konkursit dhe nuk janë zgjedhur njerëzit e duhur për këto pozita.
Ndërkohë, drejtori i Shëndetësisë në Komunën e Prizrenit, Zyber Rizanaj, ka thënë se përzgjedhjen e këtyre tre stomatologëve e ka bërë komisioni i formuar nga komuna.
“Ne nuk jemi të përfshirë në përzgjedhjen e mjekëve. Vetëm kemi formuar komisionin ad-hoc për zgjedhjen e tyre”, ka thënë drejtori Rizanaj, transmeton Koha.net.
Ky është vetëm konkursi i dytë në komunën e Prizrenit për punësimin e stomatologëve. Që nga viti 2007, asnjë stomatolog i kësaj komune nuk është pranuar nëpër Qendra të Mjekësisë Familjare, por punojnë vetëm nëpër ordinanca private.