Partia Demokratike e Kosovës e ka përgatitur deri në detaje skenarin se si ta marrë postin e kryetarit të Kuvendit dhe kësisoj ta përçaj edhe koalicionin LDK- AAK- Nisma. Burime ndërkombëtare i kanë thënë Gazetës Blic se PDK i ka kërkuar kryetarit të Gjykatës Kushtetuese të Kosovës, Enver Hasani që të vendos që çështja e kryetarit të Kuvendit të zgjidhet me votim të fshehtë, duke e tejkaluar kështu ngërçin politik dhe prurjen kështu të një vendimi të “pranueshëm” për të gjithë.
“Ka shumë gjasa që Gjykata Kushtetuese e Kosovës të dalë me vendim, që çështja e zgjedhjes së kryetarit të Kuvendit të shkojë me votim të fshehtë. Pra, Gjykata Kushtetuese do të vendos asisoj që seanca e 17 korrikut të rikthehet nga fillimi, dhe për kryetar të Kuvendit të shkohet me votim të fshehtë”, ka thënë ky burim i Gazetës Blic.
Ndërkohë, në një prononcim që e kishte dhënë para disa javësh për Gazetën Blic, nënkryetari i PDK-së, Hajredin Kuçi kishte thënë se partia e tij i ka numrat për formimin e qeverisjes së ardhshme.
“PDK-së i takon mandatari për formimin e qeverisë. I kemi 15 ditë kohë ta bëjmë atë. Pra, do të hyjmë në procedurë, dhe kush thotë që nuk do t’i bëjmë numrat, pa hyrë në procedurë, pa e provuar”, kishte thënë Kuçi më datë 2 korrik.
Të paktën 6 deputetë të partive të Bllokut do të votojnë për kandidatin e PDK-së?
Në këtë situatë, ky burim qartëson se PDK do të arrijë që të realizojë objektivat. Pra, do ta propozojë një kandidat i cili do të shkoj në votim të fshehtë. Në këtë situatë PDK i ka të paktën 6 deputetë nga partitë e Bllokut, kryesisht të LDK-së, 1 të AAK-së, që do të votojnë për kandidatin e PDK-së.
Ndërkaq, gjatë ditës PDK-ja dhe partitë e koalicionit LDK- AAK- Nisma janë përballur në seancën dëgjimore në Gjykatën Kushtetuese në lidhje me ligjshmërinë e zgjedhjes së Isa Mustafës në postin e kryetarit të Kuvendit.
Pritet që brenda pak ditësh edhe Gjykata Kushtetuese të dalë me verdiktin e saj për çështjen nëse Isa Mustafa u zgjodh në mënyrë të ligjshme apo të paligjshme në seancën konstituive të 17 korrikut.
Partia Demokratike e kishte dërguar në Gjykatën Kushtetuese çështjen e zgjedhjes së Isa Mustafës si kryetar Kuvendi.
Kryetari i Gjykatës Kushtetuese të Kosovës para dy muajsh në një intervistë që e kishte dhënë për emisionin “Rubikon” të KTV-së kishte deklaruar se Gjykata Kushtetuese nuk merret me atë se kush është grupi më i madh parlamentar e as me atë se kush e ka të drejtën që ta propozoj kandidatin për kryetar të Kuvendit, për faktin se sipas tij, kjo më tepër është një çështje politike.